سهند'ين اثرلرينين چاپ اولماسي مناسيبتي ايله بهروز ايماني ايله دانيشيق

دانيشيق آپاران: صياد دوست طلب (آوچي)

20 ايلدن آرتيق آناديليميز اوغروندا چاليشان و بو موددت بويو گئجلي- گوندوزلو مطبوعات اوغروندا فعاليت گؤسترن تحقيقاتچي،يازيچي،فولكولورچي شاعير بهروز ايماني 1343- نجو الينين باهاريندا،ساراب شهرينين اطرافيندا يئرلشن سرنسر كندينده آنادان اولموش،الي قلم توتان گونلردن وارليغيميز و مدنيتيميزين چيچكلنمسينده اؤزل ائتگيلر بوراخميشدير. تحقيقاتچي عاليم اونلارجا كيتابين مؤلليفي دير و يوزلرجه آنا ديللي كيتابلارين ايشيق گؤرمسينده اونون بؤيوك تاثيري اولموشدور. بو گونلر اونون تشببوثو ايله ميللي شاعيريميز سهندين اثرلري تبريزين اختر اينتيشاراتي طرفيندن چاپ ائديلمش و بؤيوك ماراقلا اوزـ اوزه گلميشدير.همين بهانه ايله درگيميز اوستادلا قارشي قارشييا اوتوروب،اونون صميمي سؤزلرين ائشيدديك،ايندي ايسه عيني دانيشيغين اؤزتيني سيز عزيز اوخوجولارا تقديم ائديريك:

اردم:
اوستاد، بيرينجي سورغوموز بيزي اؤز فعاليتلرينيزله تانيشتيرماق اولاجاق...
بهروز ايماني:
ياخشي ياديمدادير كي،بئش ياشيم آنجاق اولاردي. كنديميزده ايكي نفرين راديوسو واردي و هر ايكيسي ده بيزله قوهوم ايديلر،بيري باجيم اري مش ايسماعيلين،اوبيريسي ايسه عميم اوشاقلارينين بؤيوك بابالاري مشهد عبدا... ين ايدي.من واخت تاپيب ساعاتلارجا راديونون آياغيندا اوتوروب،دينلرديم.اوردان ائشتديگيم ماهنيلاري،شعرلري،ناغيللاري بئينيمده ضبط ائدرديم،اونلاردان بير نئچه سي هله ده ياديمدا دير،ايندي ده باكي راديوسوندان دينلديگيم « هاردا قالدين گلمدين » خالق ماهنيسينيني ائشيدنده بدنيم گيزيلده يير. بئش ايل موددتينده كنديميزده تحصيل آلديغيم بويو كيلاسدا دائيم بوش واختلاري و معلليملر قارا- بورانا دوشوپ گلمديگي زامان باياتيلار،قوشمالار و... اوخويارديم.باياتيلار،قوشمالار و... اوخويارديم.
اورتا اوخول كيلاسلاري كنديميزده اولماديغي ايچين،ساراب شهرينده اوخوماغي دوام ائتديرديم.درسلرين ايلك گونلرينده بيزه اينشا دئديلر.اينشانين موضوسو:« تعطيلات تابستان را چگونه گذرانديد؟» ياي تعطيلليگيني نئجه كئچيردينيز؟
منيم بير كيتابجا بو موضودا سؤزوم واردي،آنجاق بئينيمده اولان تورك آنلاميني فارس ديلينه چئويريب، يازماق منيم اوچون چوخ چتينليگه چئوريلدي. بير تهر سؤزلري قوراشديريب فارس ديلينده بير نئچه صفحه ليك اينشا يازديم و سونوندا بو جومله ني آرتيرديم كي كشگه اؤز آنا ديليميزده يازيب،اخويايديق،چونكو من بو اينشا دا سؤزلريمي ياخشي چاتديرامماديم .
اينشاني يازيب معلليمه وئرديكدن آز گئچمميشدي كي مني دفتره چاغيرديلار،اول ديله توتوب، دئديلر كي كيم بو سؤزلري سنه اؤيرديب،من دئديم وا... هئچ كيم اويرتمه ييب، سونرا اونلار دئدي: بلكه ده مهدي عبدالرحيم پور بو سؤزلري سنه دئييب،من مهدي ايله ياخين دوست ايديم،آمما اونلارين بو سورغولاريندان چوخلو حيرتلنديم. ايللر اؤتدوكدن سونرا بيلديم كي مهدي نين بؤيوك قارداشي، خالق فدائي لرينين فعال عضولريندن بيري ايميش،هر حالدا،منيم باشيمين ساچلاريندان ياپيشيب،مؤحكم دووارا ووردولار،بورنومدان قان آچيلدي. من او زامان بيلميرديم مني نييه بو سؤز اوستونده بو حالا ساليرديلار؟!
بو حاديثه مني داها آرتيق دوشوندوردو و 14 ياشيمدان باشلاياراق آنا ديللي مطبوعاتدا فعاليتلر گؤسترمگه اوز قويدوم. اينديه كيمي وطن اوغروندا ،يول درگيسينده ،ارگ و احرار هفته ليگينده و اونلارجا مطبوعاتدا ياخين امكداشليق گؤسترديم.حال- حاضيردا تبريز بيليوردوندا ياييلان سحر ژورنالينين باش رئداكتورويام،تاسفله بو درگي بير ايلدن چوخدور كي ياييلمير،«فجر آذربايجان» گوندليگينين توركجه صفحه سيني من حاضيرلاييرام و بعضي هفته ليكلر ايله ده امكداشليق ائديب،علمي و دگرلي كيتابلارين ايشيق اوزو گؤرمسينه چاليشيرام.

اردم:
بو سون واختلار اولو شاعيريميز سهندين اثرلري سيزين تشببوثونوزله اختر ناشيرليگي طرفيندن چاپ اولوب،ياييلميشدير،سيزي بو اشه ماراقلانديران سبب نه ايدي؟ چونكو سيزين اؤزونوزون اؤنملي اثرلرينيز واردير كي هله ده باسيلماييبدير،لوطفن بو خوصوصدا بيزه بير آز بيلگي وئرين.
بهروز ايماني:
اولا تانينماسيندا،ا... اونو بيزه چوخ گؤرمسين اوستاد فرزانه ايله تانينير. اوستاد فرزانه خسته لنيب،خاريجده ياشاديغي اوچون سهندين اثرلري قالدي و اخوجو يانقيسي ايسه چوخالدي. بو بوشلوغو دولدورماق ايچين هر طرفه ال آتديم،نهايت بير قوهوموموز واسيطه سي ايله سهندين اؤز سسي ايله بير چوخ كاست الده ائتديم. شعرلري اوندان كؤچوروب،باشقا نوسخه لر ليله موقاييسه ائديب و يئنيدن يازماق قرارينا گلديم. باكيدا اوستادين « ددمين كيتابي» ني گؤردوكده چوخ سئوينديم و بو كيتاب منيم ايشلريمه كؤمك اولان چيراق توتدو و من بو كيتابين موقدمه سينده اوستادين حاققيندا و اونون قيمتلي ايشلري اوزرينده لازيمي قدر معلومات وئرديم. آنجاق من حاضيرلاديغيم اثرين بير سيرا چاتيشمازليق جهتي ده واردير. اونلاردان اؤنمليسي دوكتور دوزگون ايكينجي جيلدده يازديغي موقددمه نين ناشير طرفيندن ناقيص شكيلده چاپ اولماسي دير.
بيز ايكينجي چاپدا موطلق دوزليش آپاراجاييق.

اردم:
بيلديگيميزه گؤره سيز تبريز راديو- تلويزيون ايداره سينده ده چاليشيب،بير موددت فعاليت گؤستريبسينيز و نهايت اوراني ترك ائتمك زوروندا قاليبسينيز، نه سببدن دولايي اوراني ترك ائتدينيز؟
بهروز ايماني:
من اوچ ايل موددتينده تبريز راديوسونون بين الملل بؤلومونده،اصلينده باكي ايچين ياييلان « برون مرزي» ياييملاريندا امكداشليق ائتمگه باشلاديم. ايلك گونلرده بو تشكيلاتين عيبه جر قورولوشونو دويدوم،آنجاق ايكي مسئله مني ساخلادي،بيري آنا سوتو كيمي بيزه حالال اولان،بو راديودان آزدا اولسا توركوجه ياييملاريندا ائتگيميز اولماسي و ايكينجي عاميل صيداقتله دئملييم مادديات مسئله سي ايدي. هر حالدا من مسئوللاري ماراقلانديرديم بو ياييملاري ائله حاضيرلاياق كي هم او تايلي باجي- قارداشلاريميز فايدالانسين و هم بو تايدا ديل يانقيسيندا ياشايانلارين اودو بير آز سؤنسون. بونا گؤره ده ، آذربايجان آغيز ادبياتي اساسيندا « شلاله » آدلي وئريليشين تمليني آتديم.بو وئريليشين بير ايل موددتينده هم باكيدا و هم ده بو تايدا اؤزونه مخصوص يئر آچدي.
منيم اونلارين عيبه جر ايشلرينه اعتيراضلاريم و بير چوخلاريني كيتاب و مجله آپارماقلا درين مطالعه يه ماراقلانديرماغي گؤرن غلط قورولوش موختليف بهانه ايله اوزاقلاشديرماغا باشلادي و حتي منه تكليف ائله ديكلري ، هر زامان بو دوشونجه لريندن ال گؤتورسن،بيز سني هم ايستيخدام ائلريك و هم ده يئري گلديكده برنامه مسئوللاري قوياريق،بو سببدن اوردان اوزاقلاشماغي مصلحت گؤردوم.

اردم:
اوستاد راديو- تلويزيون مركزلرينه اولان خالقين ماراغيني نئجه قيمت لنديريرسينيز؟
بهروز ايماني:
جماعتين ماراغينين حددي حودودو يوخدور،هر زامان خالقين تيستگي اساسيندا ياييملار وئريلسه،خالقيميزين يوزده دوخساني اويدو كاناللارينا باخمازلار.آخشاملار برنامه سينده من بو مسئله نين شاهيدي اولدوم.

اردم:
اؤيرنجيسل درگيلره باخيشينيز نه دير؟
بهروز ايماني:
اؤيرنجي درگيلرين قارشيسيندا ايكي مانع واردير،هر زامان اونلار اورتادان قالديريلسا ، بورنوموزون اوجوندان باشقا هئچ نه يي گؤرمميشيك. اونلاردان بيري درگيلرين ديلي و گرامري اوزرينده دير. درگيلرده توركيه توركجه سينه مئييل چوخدور.بو ماراق نه كي وارليغيميزا خيدمت گؤسترمير،بلكه بعضي هدفلريميزدن اوزاقلادير. توركيه ده منيم بير نئچه تورك دونياسينين يوكونو چيگينلرينده داشيان دوستوم واردير. اونلار منه يازديقلاري مكتوبلاريندا دائيم قئيد ائديرلر كي ،سيزي آ... ، سيزي پئيغمبر آذربايجان توركجه سينين اوسلوبوندا يازماغا گنجلريميزي ماراقلانديرين،چونكو توركيه توركجه سينين بورادا قورويانلاري حدديندن ده آرتيقدير.
باشقاسي سياست بازليقدير. سياست بازليقدان قاباق،شخصيت بئجرمكدن قاباق درگيلر،اؤيرنجيلر اؤز گئچميشينه ،تاريخينه ماراقلانمالي دير.

اردم:
اوستاد بيز ايله دانيشديغينيزا گؤره سيزدن تشككور ائديريك،ساغ اولون.
بهروز ايماني:
سيز ده ساغ اولون.


¤ نوشته شده در ساعت 9:52 توسط ardam